Португалын шигшээ баг 8 тоглож, 8 хожсоноор “ЕАШТ-2024” тэмцээний шигшээ тоглолтыг зорих эрхээ авлаа
Буурал Европ тивийн шилдгийг тодруулах тэмцээний урьдчилсан шатны хэсгүүдийн 9 ба 10-р тойргийн тоглолтууд болж, шигшээ тэмцээнд оролцох шигшээ багуудын нэрс тодорсоор. К.Рональдугийн ахалсан Португалчууд Исланд, Лихтенштейний багуудыг тус тус 2:0-ээр буулган авснаар 8 тоглож, 8 хожин, 36 гоол оруулж, ердөө 2 гоол алдсан гайхалтай үзүүлэлттэйгээр сэтгэл ханамж өндөртэйгөөр эрхээ халааслав. Францчууд Гибралтарын арлын багийг 14:0-ээр бөмбөгдөж, шавиагаа ханатал гоолын бороо оруулцгаажээ. К.Мбаппе хет-трикдэж, О.Жиру сүүлийн 2 минутанд 2 гоолыг нэр дээрээ бичүүлж, эдний багийн 9 тоглогч гоолдон, нэг автогоол орсон байна. 23 настай хурдан залуу спортын замналынхаа 300 дах гоолыг бүртгүүлэв. Тэрээр улсынхаа шигшээ багт 46 гоол, 29 дамжуулалт, ПСЖ багтаа 227 гоол, 99 дамжуулалт, Монако клубт 27 гоол, 16 дамжуулалтын статистиктэй явна. Одоогоор 3 өнгөтүүдийн мэргэн буучийн жагсаалтыг О.Жиру 54 гоол, Т.Анри 51 гоолтойгоор тэргүүлсээр. Зарим онцлох тоглолтуудыг дурьдвал Бельги 5:0 Aзербайжан, Aзербайжан 3:0 Швед, Гүрж 2:2 Шотланд, Шотланд 3:3 Норвеги. Супер од Хааланд хөлдөө хүнд гэмтэл авч, баг нь хэсгийн тоглолтоос мултарсан тааруу мэдээтэй.
