“Сод электроникс”ХХК-ийн баг ICT Sports-2023 спорт наадмын дартсын төрөлд учраа бүрээ хожсоор түрүүлэв
Харилцаа холбоо, мэдээллийн технологийн салбарын спортын наадмын өрсөлдөөн өмнөх жилүүдийнхээс харьцангуй нэмэгдэж, оролцогчдын нас улам залуужсаар. Спортын төрлүүдээс хамгийн сонирхол татам төрлүүдийн нэг болох дартсын багийн тэмцээнд 19 баг оролцохоор бүртгүүлж, “Тэмүүлэл дартс мастерс” клуб дээр хуран цуглацгаав. Хэсгийн тоглолтууд ширүүн өрнөж, хүчтэй өрсөлдөгч багуудын нэг Скайтелчүүд мултарснаар таавар ерөнхийдөө будилж эхлэв. Шөвгийн 16, цаашлаад их шөвгийн 8 багийн тоглолт үзсэн, дэмжсэн хүмүүсийг нүд хужирлах зүйлээр уйдаахгүй байлгаж чадлаа. Хэсгийн 2 өрсөлдөгчөө 2:0-ийн харьцаатай хуурай хожсон “Сод электроникс”ХХК-ийн Н.Хүрэлчулуун, Б.Саябаяр, А.Нямсүрэн, Цацрал нарын бүрэлдэхүүнтэй залуу багийнхан мөнхийн өрсөлдөгч том багуудтай яс үзсээр хасагдах шатны 3 давааг торолгүй давж, шигшээ тоглолтонд ICT Group багтай халз тулах нь тэр. Тэд эхний 2 тоглолтондоо өмнөх тоглолтуудын нэгэн адилаар багийн дундаж онооны шидэлтүүдээ жигд хадгалсаар хожил авсан бол 3 дах тоглолтонд өрсөлдөгч багийнхан сүүлийн мөчид зах дээр сөрөг дайралт хийснээр тоглолтын ерөнхий харьцааг ойртуулж, 2:1 болгож чадав. Шийдвэрлэх 4 дэх тоглолт эхлэхэд Содчуудын сумны онч илүү мэргэн байж, багийн тоглолтыг утгаар нь гаргаж чадсан юм. Туршлагатай тоглогчдын нөмөр нөөлөг, шинэ залуу тоглогчдын эрч хүч, сэтгэл зүйн бэлтгэлжилт энэ багийн амжилтын гол түлхүүр нь байлаа. Тийм ээ, тэд чадлаа. Аваргыг ялж аварга болдог нь их спортын хууль юм даа.
