Азербайжан 1:0 Монгол. Тоглолтын гол баатар хаалгач Э.Мөнх-Эрдэнэ!

Тоглолт эхэлж, талбайн эзэд довтолгоо голлосон, манайх хамгаалалт зонхилсон тоглолтыг үзүүлж эхэлсэн. 1-р үеийн эхэнд зүүн жигүүрээр, дараа нь баруун жигүүрээр маш зохион байгуулалттай довтолгоог Азербайжанчууд хийж байлаа. Тэдний уралдуулсан дамжуулалт, жигүүрээр 16-гийн талбай руу чиглэсэн дамжуулалт, цохилтууд аюул тарьсаар. Манай багийн анхны сөрөг довтолгоо 36 дах минутанд болсон. Гэхдээ хаалга руу цохиж амжсангүй. 2-р үеийн тоглолт илүү сонирхолтой өрнөсөн. Эсрэг багийн тактик нэг их өөрчлөгдөөгүй ч манай залуус тэдний эсрэг яаж тоглохоо ерөнхийд нь мэдэрсэн гэхэд болно. Энэ тоглолтын гол баатар нь Монголын шигшээ багийн хаалгач Энхтайваны Мөнх-Эрдэнэ байлаа. Хаалга руу чиглэсэн 31 цохилт! Тэр үнэхээр бахархмаар, огшмоор тоглолтыг үзүүлж чадсан. Мэдээж багийн хамгаалалтын шугамынхан түүнд сайн тусалсан. 81 дэх минутанд Ганзориг Андерсон Филип айлын хаалга руу хүчтэй цохилт хийж, хаалгач хамгаалав. Бөмбөг эзэмшилт 73:27 хувьтай, булангийн цохилт 14:2. Шүүгчийн мэдлийн 91 дэх минутанд талбайн эзэд зүүн жигүүрээр давшиж, алдаа авч чадав. Чөлөөт цохилтоос ирсэн бөмбөгийг Бахлул Мустафазаде мөргөж гоолдсоноор энэ тоглолтын эцсийн цэгийг тавьж орхисон. Хэнийг ч буруутгах аргагүй юм даа. Дамжуулалт ч супер байв. Тоог тэнцүүлэх гэж залуус маань чадлаараа хичээсэн. Боломж ч гарах дөхсөн. Булангийн цохилтоос ирсэн бөмбөгийг бужигнаан дундаас цохиод алдсан. Дасгалжуулагч сэлгээг арай л хойно хийх шиг санагдсан. Ядаж 5-6 минутийн өмнө сэлгээгээ оруулсан бол…  Монголын шигшээ баг сүүлийн 6 тоглолтондоо гоол оруулж чадаагүй, 5 хожигдож, 1 тэнцээтэй яваа. Гэхдээ нэг үеийг бодвол шигшээгийнхэн маань айж бэргэхээ больж, талбай дээр тоглож чадаж байна. Гадаадад тоглож байсан залуусаараа хүчээ сэлбэж, тэд ч сурсан мэдсэнээ харуулж эхэллээ. Болж байна шүү, залуус аа. Дасгалжуулагчдын талаар дараагийн нөхөрсөг тоглолтын дараа бичье.