Аймгийн арслангуудын аранга Хатант интернэшнл компанийн бөх Б.Гончигсүрэн

Байгуулагдсаных нь түүхт 100 жил тохиож байгаа Баянхонгор аймгийн Баянбулаг сумын ойд зориулсан МУГД, аймгийн арслан Цэдэн-Ишийн Шийрэвийн нэрэмжит аймаг, цэргийн цолтой болон залуу 256 бөхийн барилдаан уулга алдуулсан олон барилдаанаар элбэг болж, бөх сонирхогчид улсын цолтнуудын залгамж халаа болсон шижигнэсэн залуусын идрийн жавхаа гайхуулсан барилдааныг үзэж сонирхоцгоолоо. Барилдаанд Архангай аймгийн Хотонт сумын харъяат, “Хилчин” спорт хороо, “Хатант интернэшнл” ХХК, “Нью ариг ус” ХХК, “Бөхбилэгт” дэвжээний бөх, аймгийн начин Батхуягийн Гончигсүрэн хийгүй сайхан барилдаж, аймгийн арслангуудыг ээлж дараалан давсаар түрүүлж, мөн Архангай аймгийн Тариат сумын харъяат, “Алдар” спорт хороо, “Очирням” ХХК, “Хүннү Шоес” ХХК, “Бөхбилэгт” дэвжээний бөх, цэргийн заан Өнөрбаянгийн Батсуурь үзүүрлэв. Бөхийн өргөөнд анх удаагаа түрүүлсэн аймгийн начин маань бөхийн жүдо барилдаанаар хичээллэж, чамгүй амжилт үзүүлж яваа манай өсөх ирээдүйтэй тамирчин юм. Уг барилдааны их шөвгийн дөрөвт Ховд аймгийн Мөнххайрхан сумын харъяат, “Хүч” спорт хороо, “Эрдэнийн Шим” ХХК, “ЦЕГ Эргүүл хамгаалалтын газар, “Ховд” дэвжээний бөх, аймгийн хурц арслан Б.Баянмөнх, Баянхонгор аймгийн Хүрээмарал сумын харъяат, “Алдар” спорт хороо, “Прайд Транс” ХХК, “Монгол ванн” ХХК, “Хонгор нутаг” дэвжээний бөх, цэргийн арслан Г.Жамбалдорж нар шалгарсан бол дунд шөвгийн аймд аймгийн арслан Г.Ганбаатар, С.Галданцогт, М.Эрхэмбаяр, аймгийн заан Б.Батбаян нар үлдсэн байна. Нэрэмжит барилдааныг нь тохиолдуулан Баянбулаг сумын нутгийн зөвлөл, үе үеийн шавь нар, гэр бүл үр хүүхдүүд, ах дүү, төрөл төрөгсөд, найз нөхөд, нутгийн зон олон МУГД, аймгийн арслан Ц.Шийрэвт хүндэтгэл үзүүлэв. Мөн түрүүлсэн аймгийн начин Б.Гончигсүрэнд “Италта” ХХК-ийн гүйцэтгэх захирал Баянхонгор аймгийн харъяат С.Алтансүх Итали хромон гутал бэлэг болгон гардуулж, амжилт хүслээ. Ирэх 7 хоногт болох барилдааны хуваарийг танилцуулбал : 1-р сарын 13 нд шинэ “Үндсэн хууль” батлагдсаны 31 жилийн ойд зориулсан улс, аймаг, цэргийн алдар цолтой 128 бөхийн, 1- сарын 14 нд “Талх Чихэр”ХК-ийн нэрэмжит “Хэвийн боовны баяр” уламжлалт барилдаанаар тус тус үргэлжилнэ.