Англи дартсчин дэлхийн аваргын цомыг өргөнө
PDC ДАШТ-ий 14 дэх өдрийн их шөвгийн шилдэг 8 тамирчны гал гарсан 4 тоглолт үзсэн хүн бүрийн сэтгэлийг хөдөлгөж чадав. Эхлээд шилдэг наймд үлдсэн дэлхийн 2 аваргын нэг, чансааны 8 дах тоглогч Р.Кросс болон дэлхийн чансааны 17, хоёр жил дараалан их шөвөгт үлдээд байгаа Ч.Добейтэй тоглов. 33 настай үе чацуутнуудын тоглолт ширүүхэн эхэлж, шууд л 0:4 болж, аваргыг ихэд сандаргасан ч тэрээр буурь заан хөөж тоглон, бараг боломжгүй шахам нөхцөл байдлаас санаанд оромгүй эргэн ирэлт хийж чадсанаар хагас шигшээгийн босгыг ямартаа ч давлаа. Дараагийн тоглолтонд өнөөх 16 настай гоц хүү Л.Литтлер дэлхийн чансааны 28 таван жилийн өмнө шилдэг наймд үлдэж байсан, 45 настай Б.Долантай туллаа. Залуу насны эрч хүч, төрөлхийн авъяас нь халгиж цалгисан Англи бацааныг үнэндээ яаж ч чадсангүй дээ. Лукегийн 140 онооноос сүүлийн 3 сумны 54+54+32 гэдэг аймшигтай шидэлтүүд өрсөлдөгчийнх нь зүрхэнд шар ус хуруулсан нь лавтай. 3 дах тоглолтонд цорын ганц Англи биш тоглогч болох Дэлхийд гурвантаа нэр алдраа цуурайтуулсан, чансааны 2 дугаар Нидерландын алдарт MVG ба дэлхийн чансааны 52-т нэрээ бичүүлсэн нутгийн тоглогч С.Уилльямс нар тоглохоор тайзнаа гарлаа. Хашир аварга 2:1-ээс бариулаад, 3:3 дээр нэг тэнцэж аваад цааш барсангүй цагаан тугаа өргөх нь тэр. Ингээд дан Англичууд хагас шигшээд үлдэж, хэн азтай, одтой нь аваргын цомыг өргөх нь тодроод ирэв. Харин сүүлийн 4 дэх тоглолтонд дэлхийн чансааны 3 өнгөрч буй улирлын сүүл рүү хамаг цомыг хамсан шуналтай этгээд Л.Хампрьес дэлхийн чансааны 11 Д.Чисналлтай таарсан. Цом цуглуулагч залуу өрсөлдөгчийнхөө 3 жилийн өмнө хагас шигшээд үлдэж байсан сайхан дурсамжийг үгүй хийж, бараг л хуурай хожив. Шилдэг 4 дартсчины нэрс тодорлоо. Цааш яах бол? Дэлхийн аварга, цом түүгч, өсвөрийн од, битүү морьд бүгд байна. Хэн нь үе үеийн шилдгүүдийн хөлс хүч шингэсэн дэлхийн аваргын гоёмсог цомыг толгой дээрээ бахархал дүүрэн өргөх бол? Энэхүү тоймыг бичигчийн хувьд Аварга-Шинэ залуу одын аль хожсон нь л түрүү булаах болов уу гэж таамаглаж байна.
Спортын сэтгүүлч Н.Тамир
Их шөвгийн сүүлийн 2 тоглолтын тойм
[embedyt] https://www.youtube.com/watch?v=Gcma_JFcrg0[/embedyt]
Их шөвгийн эхний 2 тоглолтын тойм
[embedyt] https://www.youtube.com/watch?v=WfZfVYCEQpE[/embedyt]
