Багийн ахлагчийн одтой өдөр
Монголын Премьер лигийн 10-р тойрог. Булган СП Фалконс 6:1 Брера Илч”. Хоёр багийн өмнөх тоглолтод “Фалконс” 6:1-ээр илт давамгайлсан. Улмаар “Фалконс” эхний тойргийг 8 хожил, 1 тэнцээтэй өндөрлүүлсэн бол “Брера Илч” нэг л хожил авсан. Гэхдээ өвлийн завсарлагын үеэр багуудын бүрэлдэхүүн эрс өөрчлөгдөж, олон шинэ тоглогчид ирсэн болохоор тоглолт сонирхолтой болно гэсэн хүлээлт байлаа. “Брера Илч” солилцооны цонхоор Сери Б-д тоглож байсан Итали довтлогч Маттео Ортолани тэргүүтэй 5 легионер болон дотоодын 6 тоглогчийг эгнээндээ нэгтгэж, хүчээ сайн зузаатгажээ. Харин “Фалконс”-ын хувьд М.Алмейда, Т.Томайс гэсэн 2 бразил тоглогчийг авчирсан байна.
Тоглолтын эхний гоолыг “Фалконс”-ын ахлагч М.Төгөлдөр алсын цохилтоор оруулсан. “Брера Илч”-ийн хаалгач энэ гоолын буруутан нь. Гэхдээ удалгүй “Брера Илч” тоог тэнцүүлж чадсан. 30 дах минутанд “Фалконс”-ын хамгаалагч Т.Томайс торгуулийн талбайдаа А.Содмөнхийг унагаж, шүүгч үүнд нь пенальти заасан. Торгуулийн цохилтыг япон легионер С.Аото амжилттай гүйцэтгэж, тоог тэнцүүлсэн юм.
Сонирхуулахад “Фалконс” 1-р тойргийн 9 тоглолтод хаалгандаа ганц л гоол алдсан бөгөөд тэрхүү ганц гоолыг “Брера Илч”-ийнхэн оруулсан юм. Энэ удаад ч тэд хүчирхэг хамгаалалттай өрсөлдөгчийнхөө хаалганд гоол оруулж чадсан. Энэ гоолоос 6 минутын дараа М.Төгөлдөр 2 дах гоолоо оруулж, багтаа тэргүүллийг дахин авчрав. А.Фэррэйрагийн баруунаас хөөргөж өгсөн дамжуулалтыг тэрбээр цээжин дээрээ тогтоон гуядаж цохиод тоог 3:1 болголоо. Дараа нь М.Төгөлдөрийн дамжуулсан бөмбөгийг бразил хамгаалагч Т.Томайс мөргөж гоолдон өмнөх алдаагаа залруулсан.
Улмаар “Фалконс”-ын жигүүрийн довтлогч Б.Намсрай дараалан 2 гоол оруулж, тооны харьцааг 5:1 болгосноор тоглолтын хувь заяаг үндсэндээ шийдэж орхив. Сүүлд сэлгээгээр талбайд гарсан В.Эвертон зөрүүг улам холдуулснаар “Фалконс”-чууд “Брера Илч”-ийг 2 тойрог дараалан 6:1 гэсэн оноогоор хожиж байгаа нь энэ. Энэ тоглолтын дараа “Фалконс”-ын М.Төгөлдөр, Б.Намсрай нар 5, В.Эвертон 6 гоолтой болж, мэргэн буучдын өрсөлдөөнд хамтдаа орж ирлээ.
Тоглолтын 2-р үе Барилдааны бүтэн бичлэг үзэх
Тоглолтын шилдгээр “Фалконс”-ын довтлох чиглэлийн хагас хамгаалагч, багийн ахлагч М.Төгөлдөр тодорлоо. Тэрбээр энэ тоглолтод багийнхаа эхний 2 гоолыг оруулснаас гадна дахин 2 гоолын дамжуулалт өгсөн. Ингэснээр түүний оновчтой дамжуулалтын тоо 6 болж, энэ үзүүлэлтээр бүх тоглогчийг тэргүүлж эхлээд байна.
Mongolian Premier League
