Бүх оддын тоглолтонд хэн хэн урилгаар оролцох вэ?

Сагсан бөмбөгийн лигийн “Бүх оддын тоглолт-2024” энэ баасан, бямба гаригт UG Аренад зохион байгуулагдах гэж байна. Цагирагт довтлох, 3 онооны шидэлт, ур чадварын тэмцээнүүдэд улирлын тоглолтын шилдгүүдээс гадна зарим шилдэг тамирчид урилгаар оролцоно. Үзэгчдийн хамгийн их хүсэн хүлээдэг тохолтын тэмцээнд М Хөгжлийн лигийн энэхүү тэмцээний аварга “Мазаалай” багийн тоглогч Э.Баярт-Эрдэнэ, холын шидэлтэнд М Хөгжлийн лигийн Бүх оддын тоглолтын 3 онооны шидэлтийн аварга “Хөвсгөл Captain” багийн тоглогч Д.Отгонзаяа, эрэгтэйчүүдийн өрсөлдөөнд лигийн тэмцээнд 20 дах улиралдаа тоглож буй хашир мастер “BCH Гарьд” багийн Б.Мөнхболд, “TLG Ондилт” багийн Э.Цэвэлдорж нар болон М Хөгжлийн лигийн Бүх оддын тоглолтын шидэлтийн аварга “Мазаалай” багийн тоглогч С.Төгөлдөр гэсэн тоглогчид бусад тамирчдын хамтаар үзэгч олондоо ур чадвар, авхаалж самбаагаа гайхуулж, бэлэг барина.