Дэрэнгийн залуус лигийн олон удаагийн аваргуудын хаалганд 7 гоол оруулав

Монголын Премьер лигийн 12-р тойрог. Дэрэн 7:0 Хаан Хүнс-Эрчим. Хоёр багийн сүүлийн 10 тоглолтын долоод нь хожоод байсан Дэрэнчүүд энэ удаад өрсөлдөгчөө 7:0 гэсэн том тоогоор хожсоноор энэ улирлын хамгийн том ялалттай зэрэгцэж ирлээ. Өмнө нь “Брера Илч” клуб “Баварианс”-ыг мөн ийм зөрүүгээр буюу 8:1-ээр хожиж байсан билээ.

Дэрэнгийн хамгаалалтын гол шугамын тоглогч О.Мөнх-Оргил хуудасны улмаас энэ тоглолтыг өнжсөн. Цагаан цэнхэрүүдийн марокко легионер Акава Салим нэг гоол оруулснаас гадна оновчтой дамжуулалтаар хет-трик хийж гялалзав. Жигүүрт түүнийг зогсооно гэдэг “Эрчим”-ийн хамгаалагчдын хувьд бэрх даалгавар байв.

Мөн Ц.Далайцэрэн гоол, 2 оновчтой дамжуулалт бүртгүүлж, багийнхаа ялалтад том үүрэгтэй оролцжээ. Тэрээр 2 тойрог дараалан гоолдсоноор нийт 5 гоол нэр дээрээ бүртгүүлээд байна. “Дэрэн”-гийн довтлогч Б.Өсөх-Ирээдүй сэлгээгээр талбайд гараад 2 гоол оруулан, 7  бөмбөгтэй болж, мэргэн буучдын жагсаалтанд орж ирэв. Тус багийн ирээдүй болсон залуусын нэг, удахгүй 17 нас хүрэх Ө.Содбилэг гоол оруулж, гоолын дамжуулалт өгснийг мөн дурдах ёстой. “Хаан Хүнс-Эрчим”-ийн хувьд хаврын тойргийг урамтай эхлүүлж, “Ховд”-ыг 5:2-оор хожин, “Төв Азарганууд”-тай 2:2-оор тэнцээд байсан бол энэ удаа “Дэрэн”-гийн залуусын эсрэг тун хангалтгүй тоглож, нэлээн хүнд цохилт авав. Дэрэнгийнхэн тоглолтын турш нийт 19 цохилт гүйцэтгэсний 11 нь хаалга чиглэсөн бөгөөд 70 хувьтай бөмбөг эзэмшжээ.