Дэрэн анхны ялагдлаа хүлээж, Төв Азарганууд хүснэгтийн гуравт бичигдэв

Монголын Премьер лигийн 10-р тойрогт. Төв Азарганууд 3:2 Дэрэн   Тоглолтын бүтэн бичлэг үзэх

Энэ тойргийн тун өрсөлдөөнтэй, сонирхолтой тоглолтын нэг. Тоглолт эхлээд удалгүй Төв Азарганууд сөрөг довтолгоогоор гоол оруулсан. Багийн ахлагч Х.Цэнд-Аюушийн алсын дамжуулалтыг япон легионер Суда Казуха хүлээн авч, хаалгачийн эсрэг сугаран гарч ирээд гоолын салхийг хагалав. Гэхдээ тэдний тэргүүлэл удаан үргэлжилсэнгүй. “Дэрэн”-гийнхэн бөмбөгийг тоглолтод оруулсан даруйдаа эхний довтолгоогоороо гоол хийлээ. Марокко легионер Акава Салимын баруунаас дамжуулсан бөмбөгийг Давид гүйцээн тоог тэнцүүлсэн юм. Харин 2-р үед Азарганууд тоглолтыг эргүүлж чадсан. 54 дэх минутанд тус багийн шинэхэн япон легионер Коанегийн зүүнээс дамжуулсан бөмбөгийг Г.Ёндонжамц гүйцээж, тоог 2:1 болголоо. Энэ гоолоос 4 минутийн дараа Дэрэнгийнхэн торгуулийн талбайдаа Я.Коанег унагаж, шүүгч торгуулийн цохилт заав. Довтлогч Ц.Түмэнжаргал цохилтыг хийгүй гүйцэтгэснээр Азарганууд 3:1-ээр тэргүүлж эхэллээ. Ц.Түмэнжаргалын хувьд улирлын 6 дах гоолоо оруулснаар мэргэн буучдын өрсөлдөөнд орж ирсэн. Япон хөл бөмбөгч Коане гоолын дамжуулалт өгснөөс гадна багтаа торгуулийн цохилт авчирч, эхний тоглолтдоо л багтаа чухал нөлөө үзүүлж эхэлсэн. Харин 87 дах минутанд Дэрэнчүүд тоог ойртуулснаар тоглолтын үлдсэн цөөн минутийг улам өрсөлдөөн дүүрэн өрнүүлэв.

Энэ удаа марокко тоглогч Акава Салим багтаа торгуулийн цохилт авчирч, пенальтийг өөрөө амжилттай гүйцэтгэснээр тоог 3:2 болгосон. Гэхдээ үлдсэн хугацаанд Төв Азарганууд амжилттай хамгаалж чадсанаар улирлын 6 дах ялалтаа авч, хүснэгтийн 3-р байр руу дэвшсэн бол Дэрэн клубийнхэн анхны ялагдлаа амслаа. Тэд өмнөх 9 тоглолтондоо 6 хожиж, 3 тэнцээд байсан билээ. 11-р тойрогт Төв Азарганууд-Хаан Хүнс-Эрчим, Дэрэн-Хоромхон гэсэн тоглох хуваарьтай.