Малчин түмэндээ тусалъя-Хандивын барилдаан

МҮБХ-ноос цаг үеийн хүндрэлтэй байдал үүсэж, цас зудын бэрхшээл тулгарсан малчдадаа туслахаар зохион байгуулсан улс, аймаг, цэргийн алдар цолтой 128 бөхийн “Малчин түмэндээ тусалъя” хандивын барилдаанд Ховд аймгийн Буянт сумын харъяат, Говь-Алтай аймгийн Жаргалан сумын уугуул, “Аврагч” спорт хороо, “Од” групп, “Их Монгол” сан, “Эм Жи Ө транс” ХХК, “Ховд” дэвжээний бөх, улсын аварга Оргихын Хангай түрүүлж, Ховд аймгийн Зэрэг сумын харъяат, “Аврагч” спорт хороо, “Монтед” констракшн, “Өнө мөнх хөгжил Констракшн” ХХК, “Валькан” групп, “Ховд” дэвжээний бөх, улсын заан Баярхүүгийн Бат-Өлзий үзүүрлэлээ. Их шөвөгт Булган аймгийн Сайхан сумын харъяат, “Алдар” спорт хороо, Булганхангай дэвжээний бөх, аймгийн арслан Н.Намнансүрэн, Архангай аймгийн Тариат сумын харъяат, “Алдар” спорт хороо, “Очирням” ХХК, “Хүннү Шоес” ХХК, “Бөхбилэгт” дэвжээний бөх, цэргийн заан Ө.Батсуурь нар шалгарчээ. Дунд шөвгийн наймд улсын заан Д.Анар, улсын начин Д.Амаржаргал, аймгийн арслан Т.Довчинсэмбээ, аймгийн арслан Л.Энхсаруул нар үлдсэн байна. Барилдааны үеэр үзэгчдээс автомашины азтан нэг, бүтэн жилийн хугацаанд “Монгол бөхийн өргөө”-д бөхийн барилдаан үзэх эрхийн бичгийн азтан гурвыг тус тус тодруулсан бөгөөд бөх үзэх эрхийн бичгийн азтанаар н.Нарангарав, Ховд аймгийн Булган сумын харъяат Б.Ууганбаяр, Завхан аймгийн Тосонцэнгэл сумын харьяат Ц.Ганбат нар тодорсон бол супер азтан буюу Автомашины эзнээр Увс аймгийн Өлгий сумын харъяат О.Лутсайхан тодорч, Япон суудлын автомашины түлхүүр гардаж авлаа. Барилдааны бүх орлогыг нэгтгэн нээлттэй танилцуулж, Улсын онцгой комисст хүлээлгэн өгөх бөгөөд бөхийн өргөөнд хүрэлцэн ирж хандив өргөсөн бүх хүнд МҮБХ-ноос батламж гардуулав. Энэхүү барилдааны шууд дамжуулалтын үеэр телевизийн эфирт байршуулсан МҮБХ-ны дансанд чин сэтгэлийн хандиваа харамгүй илгээсэн үзэгч олон болон хүрэлцэн ирж хандив өргөсөн бөхийн дэвжээд, бөхчүүд, бөхийн зүтгэлтэн, дэмжигчид, өнөөдрийн барилдаанд зодоглож давааны мөнгөө хандивласан бөхчүүд, ажлын урамшууллаа хандивласан жаяг дэгийн багийнхан, тасалбар худалдан авч бөхөө үзэнгээ хандивт оролцсон үзэгчид, мөн хамтран ажиллаж, барилдааныг эх орон даяар шууд дамжуулсан “TV9”, Үндэсний олон нийтийн радио телевиз, Үндэсний “Малчин” телевизийн хамт олондта бүхэндээ бүгдэд нь ГҮН ТАЛАРХАЛ илэрхийлье.