Монголын хөнгөн атлетикч Ц.Баттулга медалийн буухиаг үргэлжлүүлэв
Азийн зуны спортын пара наадмын 3 дах өдөр манай тамирчид 1 алт/таеквондо/, 3 хүрэл/жүдо 2, хөнгөн атлетик 1/ медаль хүртсэн үзүүлэлт нь багийн 16-р байраа бататгав. Хөнгөн атлетикийн тэмцээнд үндэсний шигшээ дасгалжуулагч В.Батболдын удирдлага дор 9 тамирчин оролцож байгаагаас бөөрөнцөг түлхэлтийн F40 ангилалд тамирчин Ц.Баттулга 9.74 метр түлхсэнээр пара наадмын бөөрөнцөг түлхэлтийн төрөлд хүрэл медаль хүртсэн анхны монгол эрэгтэй тамирчин болж, улсын дээд амжилтаа ч шинэчлэн тогтоолоо. Энэ нь түүний 2 дах Азийн наадам бөгөөд өмнө нь “Инчён-2014” Азийн пара наадамд шагналт 4-р байр эзэлж, ДАШТ-д 7-р байрт шалгаран, Бээжингийн гранпригийн аварга, бүх Оросын тэмцээнээс алтан медаль авч байсан шилдэг тамирчин билээ. Ц.Баттулга нь шүдний их эмч мэргэжилтэй ба Булган аймгийн нэгдсэн эмнэлэгт ажилладаг. Өнгөрсөн жилээс пара спортоор идэвхтэй хичээллэж байгаа аж.
