Найман минутанд гурван гоол оруулсан Хантерс багийн анхны ялалт
Дээд лиг. 4-р тойрог. Улирлын тоглолт-19. Khangarid FC 1 :4 Hunters FC. Эхний 3 тоглолтоос 2 хожил авсан лигийн хур туршлагатай багийнхан хожлоо ахиулах гэж лигийн шинэ цэргүүд ганц тэнцээгээ хожил болгох зорилготой талбайд гарсан нь дамжиггүй. Багууд легионер тоглогчдоо талбайд бүрэн ашиглахаар гаргацгаав.
Эрдэнэтийн баг бөмбөгийг тоглолтонд орууллаа. Тоглолтын ердөө 2 дох минут эхлэхтэй зэрэгцэн #17 Мишима Юта 16-гийн талбайд гоцлол тоглолт хийн, айлын тавын шугаманд ойртож явсан #16 Г.Билгүүнд бөмбөгийг дамжуулсныг багийн анд нь богинохон зайд, хаалганы бага талд нь цохиж оруулав. Тэргүүлэл авсан баг хэсэгтээ л эрчээ алдсангүй. Гэхдээ тоглолтын 19 дэх минутад #20 Ким Тэ Миний хойд талаас өгсөн алсын дамжуулалтыг Хантерсын #22 Г.Сайнбуян мөргөж урагшлуулан, хамгаалагчаас биеийн хүчээр илүүрхэн бөмбөгийг эзэмшиж, #42 Чү Тэ Минд өгснийг тэрээр довлогч #77 Ан Сежүн хүлээж аван, хамгалалтыг цөм дайран орж, хүчтэй цохилтоор тоог тэнцүүлснээр 1:1 харьцаатай эхний хагас тэнцүүхэн өндөрлөлөө.
Завсарлагаанаас хойш тун тэнцүүхэн явсан тоглолт 73 дах минутаас Хантерсын дараалсан шуурган довтолгоо үр дүнгээ өгч эхэлсэн. Тэд хажуугийн шугамаас бөмбөгийг эсрэг багийн талбай руу холхон шидэж, улмаар довтлогч хүн торгуулийн талбайд хэрхэн тоглохыг харуулж, бужигнаан дундаас #9 Э.Мөнгөнбаганын зүүн хөлийн цохилт байгаа оносноор тоог 2:1 болгов. Зэрвэсхэн харахад түүний цохилтоос өмнөхөн торгуулийн цохилт ч байж болохоор үйлдлийг Хангарьдын хамгаалагч гаргаж байгаа харагдсан. Удалгүй 79 дэх минутанд Хантерс багийн сэлгээгээр орж ирсэн М.Бямбасүрэн мөргөж гоолдон тоог бүүр холдуулж чадсан. Түүнд өгсөн Солонгос легионерийн хууралт, ур чадвар, дамжуулалт бол тасархай, тасархай. Лигийн аваргуудын хувьд байдал улам л хүндхэн болж ирэв. Дахиад 2 минут өнгөхөд тоо аль хэдийнээ 4:1 болсон байлаа. Мөн л М.Бямбасүрэн гоолдов. Тийм бэлэн зуушнаас яаж татгалзах вэ дээ. Эсрэг баг нь тоглолтын төгсгөлд ердөө наймхан минутанд 3 гоол оруулаад хожчихно гэж Хангарьдынхан төсөөлөөгүй байх. Бөмбөг бөөрөнхий гэдэг энэ. Хантерсын хагас хамгаалалтын шугам, зүүн жигүүрийн довтолгоо, ялангуяа Со легионерүүдийн хурд, техник үнэхээр ганган байсныг онцолъё, бас багт баярыг хүргэе.
Бүтэн тоглолт үзэх :
[embedyt] https://www.youtube.com/watch?v=4KbpGcaZbHI[/embedyt]
Тоглолтын гэрэл зургаас
