Саяхан л гарааны зурхайд зогсож байсан залуу унаганууд хэдийнээ ажнай хурдан хүлгүүд болжээ
Лигийн тэмцээний плэй-оффын хагас шигшээ тоглолт-5 /1:4/ Эрдэнэт Майнерс 78:88 Хасын Хүлэгүүд Тоглолтын тойм
Улирлын 1-р тойргийг тун ч адармаатай тааруухан эхлүүлсэн лигийн олон удаагийн аварга Хасын Хүлэгүүд баг плэй-оффын эхний хасагдах шатанд 5-р байраар гарч, яван чангарсаар шигшээ тоглолтонд тоглох эрхээ авлаа. Нэг ёсондоо 20 жилийнхээ ойн дээр 8 дах аваргын цомоо өргөхийн төлөө багаараа зүтгэх нь. Мөнхийн өрсөлдөгч Гарьдууд, өнгөрсөн жилийн аварга Майнерсуудтай хийсэн хүндхэн тоглолтууд энэ багийн залууст туршлага суулгаж, саяхан л гарааны зурхайд зогсож байсан залуу унаганууд хэдийнээ ажнай хурдан хүлгүүд болжээ. Нөгөө талд гол тоглогчдын гэмтэл бэртэл, зарим тоглогч дасгалжуулагчдын үл ойлголцол гээд олон хүчин зүйлүүд тэдний аваргын цомоо хамгаалах хүсэл тэмүүллийг нь үгүй хийлээ. Тав дах цувралын эхний 3 үед бүхэлдээ Хүлэгүүд азаргалж, Уурхайчид уурхайныхаа амны гол хаалгыг хааж чадсангүй нуралт үүсгэж орхив. Холбон тоглогч Г.Ган-Эрдэнэ техникийн алдааны улмаас талбайгаас хөөгдсөн нь бүүр ч нэрмээс болсон. Майнерсаас төвийн тоглогч О.Энхбаатар 24 оноо, 10 самбар, багийн ахлагч Н.Золжаргал, А.Тэмүүжин нар 12 оноо, хашир мастер Г.Баттөр 11 оноо авав. Хүлэгүүд гарааны бүрэлдэхүүнээ дан залуусаар бүрдүүлж, гараанаас эрч хүчтэй хурдаа авсаар барианд орцгоолоо. Харин 4-р үед Эрдэнэт Майнерсаас гэнэтийн хүчтэй сөрөг довтолгоо ирж, оноог нэлээн ойртуулаад амжсан шүү. Статистик үзүүлэлтийг харахад Хүлэгүүдийн төвийн тоглогч Ж.Мосс 35 оноо, 8 самбар, Б.Билгүүн 15 оноо, 9 самбар, 4 дамжуулалт гээд ерөнхийдөө бүх тоглогчдоо ашиглаж, 2 тоглогчоос бусад нь оноо авчээ. Үр дүн нь 88:78 хожил! Лигийн 7 удаагийн аварга багийнхан дараагийн учраагаа тодортол түр ч болов амсхийгээд амжих нь. Тэдний өрсөлдөгч хэн байх бол? Өмнөх жилийн дэд аваргууд уу? Энэ жилийн дуулиан шуугиант IHC Апес баг уу? Аль баг нь ч шалгарсан аваргын төлөөх тоглолт 6-7 цувралаас наашгүй байх гэж таамаглаж байна. Ай даа, нүд баясгаж, сэтгэл сэргээсэн үзүүштэй сайхан гарын арван хуруунд багтах тоглолтууд бид бүхнийг хүлээж байна.
Спортын сэтгүүлч Н.Тамир
Б.Билгүүний яриа Бичлэг үзэх
Тоглолтын дараах Хэвлэлийн хурлын бичлэг
