Хатант Интернэшнл компанийн бөх, аймгийн арслан Э.Мөнхжаргал торолгүй түрүүлэв
Сар шинийн баярт зориулсан “Дашчойлин” хийдийн нэрэмжит аймаг, цэргийн цолтой болон залуу 256 бөхийн уламжлалт барилдаанд Архангай аймгийн Хотонт сумын харъяат, “Сүлд” спорт хороо, “Хатант интэрнэшнл” ХХК, УСУГ, “Бөхбилэгт” дэвжээний бөх, аймгийн арслан Эрдэнэхүүгийн Мөнхжаргал түрүүлж, Өвөрхангай аймгийн Хархорин сумын харъяат, “Алдар” спорт хороо, “Алтан жолоо” групп, “Их Монголын хүчтэн” дэвжээний бөх, аймгийн хурц арслан Оюунгэрэлийн Наранбаатар үзүүрлэлээ. Түрүү бөхийн хувьд уржнан жилийн сар шинийн баярт аймгийн заан цолтой буюу хамгийн бага цолтой түрүүлэн шуугиулж байсан бол энэ жил “Бага наадам”-ын өмнөх аймаг, цэргийн цолтнуудын хүч шавхсан барилдаанд одтой наадан, торолгүй түрүүлж, түмэн олноо цэнгүүлэв. Тэрээр сүүлийн 3 даваанд өөрийн үндсэн бусгах, хөмрөх мэхүүдийг төгс хийлээ. Ялангуяа түрүү үзүүрийн барилдаанд хийсэн мэх нь 2022 оны Үндэсний их баяр наадмын наймын давааны даян аварга Н.Батсуурь, улсын арслан Б.Орхонбаяр нарын барилдааныг өөрийн эрхгүй санагдуулав. Тээр жил Ч.Санжаадамба аварга сар шинийн 2 барилдааны түрүүг дараалаад хамаад явсан амжилтыг давтах, мөн аймгийн заан, аймгийн арслан цолтой түрүүлсэн гэдэг дахиж бараг л давтагдахгүй амжилтын эзэн болох ховорхон боломж түүний өмнө байна. Өнөөдрийн барилдааны их шөвгийн дөрөвт Баян-Өлгий аймгийн Алтай сумын харъяат, “Ай Ти Эл Экспресс” ХХК, “Өлгийн хүчтэн” дэвжээний бөх, аймгийн хурц арслан М.Еркебулан, Сэлэнгэ аймгийн Сант сумын харъяат, “Таван-Хан” дэвжээний бөх, аймгийн арслан Б.Ганбаяр нар шалгарсан бол дунд шөвгийн наймд аймгийн арслан Ш.Отгонтөгс, Т.Сайханжаргал, Д.Алтанцоож, аймгийн заан Ч.Даш нар үлдэв. Мөн түрүү бөхийг “Италта” ХХК-иас итали хромон гутлаар урамшуулав. Маргааш хилэнт эх хэмээх модон луу жилийн сар шинийн баярт зориулсан улс, аймаг, цгийн алдар цолтой 256 бөхийн барилдааны нэг, хоёрын даваа эхэлнэ. Барилдаанд улсын даян аварга 1, аварга 2, улсын арслан 2, улсын гарьд 2, улсын заан 7, улсын харцага 14, улсын начин 41, нийт 69 улсын цолтон зодоглохоор бүртгүүлээд байна.
