Үндэсний дээд лигийн 2-р тойргийн тоглолт эхэлж байна

“Азийн цом-2025” тэмцээнд Монголын шигшээ баг тоглосонтой холбоотойгоор түр завсарласан Үндэсний дээд лигийн 2-р тойргийн тоглолт Улс тунхагласны ойн өдөр эргэн ирлээ. Энэ өдрийн тоглолт эмэгтэй багуудын тоглолтоор эхэлж, лигийн аварга Эрдэнэт Майнерс болон дэд аварга Бишрэлт Металл багуудын тоглолтоор үргэлжлэх бол хамгийн сүүлд тоглолтын хэв маяг, эрэмбэ ойролцоо Налайх Бизон-Сэлэнгэ Бодонгууд багууд хоорондоо тулна.

BCH Knights багийн тоглогч Пендарвис Виллиамс энэ улиралд ганц ч чөлөөт шидэлтээ алдаагүй буюу 100%-ийн гүйцэтгэлтэй, 13.5 оноо, 7.9 самбар, 6.1 оновчтой дамжуулалт бүхий олон талт тоглолтыг үзүүлж байна. Харин эмэгтэй тоглогчдоос энэ улиралд 20-иос дээш 3 онооны шидэлт амжилттай гүйцэтгэсэн цор ганц тоглогч байгаа нь Омни Хүлэгүүд багийн тоглогч Ө.Индра юм. Тэрээр мөн улиралд 20.8 оноо дунджилж буй үзүүлэлтээрээ лигт 2-р байрт бичигджээ.