Өндөр харцагын өнгөтэй түрүү
“Korea open Ssireum-2023 festival”-ын Солонгосын үндэсний сырим бөхийн төрөлд Монгол, Испани, Шинэ Зеланд, Англи, БНХАУ, Вьетнам, Казакстан, Итали гэсэн 8 улсын бөхчүүд арга мэх, бядаа сорин өрсөлдсөнөөс улсын харцага О.Мөнх-Эрдэнэ шөвгийн 16-д улсын начин Б.Түвшинтөгсийг давсан бол улсын начин Б.Даваа-Очир Испанийн бөхийг илүүрхэв. Шөвгийн наймд Б.Даваа-Очир начин аймгийн хурц арслан Н.Өсөхбаярт өвдөг шорооджээ. Ингээд их шөвгийн дөрөвт О.Мөнх-Эрдэнэ, Н.Өсөхбаяр нар хоорондоо хүч үзэн, харцага давав. Үзүүр түрүүний барилдаанд манай бөх О.Мөнх-Эрдэнэ Испани өрсөлдөгчөө 3:1-ээр давснаар энэхүү нэр хүндтэй наадмын түрүүг хүртсэн Монголын 3 дах бөхөөр тодорлоо. 2012 оноос хойш 9 дэх удаагаа зохион байгуулагдаж буй фестивалийн барилдаанд Испаничууд зургаад нь түрүүлж, 2018 онд улсын аварга О.Хангай, 2022 онд улсын начин Д.Тамир нар цомын эзэн болж байв. Харин 2015, 2020, 2021 онуудад уг арга хэмжээ болоогүй аж.
