Хоромхон багийн клубын ойдоо барьсан амттай хожил

Монголын Премьер лигийн 15-р тойргийн тоглолт. Хангарьд 3:4 Хоромхон. Монголын хөл бөмбөгийн ууган клубүүдийн нэг “Хоромхон” клуб энэ өдрүүдэд 25 жилийн ойгоо тэмдэглэж байна.

Тэд ойн баярынхаа үеэр “Хангарьд”-ын эсрэг сэтгэл гэгэлзүүлсэн гайхалтай тоглолт үзүүлж, эцсийн мөчид 4:3-аар ялалт байгууллаа. “Хангарьд” энэ тоглолтод тэргүүллийг түрүүлэн авч, “Хоромхон” тэнцүүлэх байдлаар өрнөсөөр үндсэн цагийг дуусгасан. Харин шүүгчийн сунгасан 6 минут дуусахын өмнөхөн япон хамгаалагч Кагава Шого баруунаас дамжуулсан бөмбөгийг амжилттай мөргөн гоолдож, тулааны эцсийн цэгийг тавьсан юм. “Хоромхон”-ы ахлагч Т.Мөнхбаатар энэ тоглолтод дубль хийснээр 11 гоолтой болж, багийн анд Н.Наранболдын хамтаар мэргэн буучдын жагсаалтын дэд байрт бичигдэж эхлэв. “Хангарьд”-ын довтлогч З.Тэмүүлэн энэ тоглолтонд бөмбөг оруулснаар түүний гоолын тоо 13-т хүрэв. Тун чухал ялалт байгуулсан “Хоромхон”-чууд 22 оноотой болж, хүснэгтийн 6-р байр руу дэвшлээ. Тэд дараагийн тойрогт “Ховд”-той тоглох бол “Хангарьд”-чууд хүснэгтийг хожигдолгүй тэргүүлэгч “Булган СП Фалконс”-той тоглох хуваарьтай байна.