Жүдоч Б.Эрдэнэбаяр дагах барилдаанд торгуулиар хожигдлоо
Бөхийн жүдо барилдааны 73 кг. ОУХМ Батзаяагийн ЭРДЭНЭБАЯР. Хатуухан сугалаа таарч, 2024 оны дэлхийн аварга, Швейцарийн бөх Нилс Штамптай барилдан, хурц дайчин өрсөлдөөнийг утгаар нь үзүүлэн, нэмэлт цагт ялснаар 1/8-д шалгарав.
Түүний дараагийн учраа нь Испанийн бөх Касес Рока Сальвадор байлаа. Бас л нэмэлт цагт ширүүхэн, хүч нөөцөө шавхаж, тамирчин хүний тэсвэр тэвчээрийн бшрэм хатуужлыг харуулан ялалт байгуулав. Барилдааны нийт хугацаа 10 мин 12 сек!
Шилдэг 8 бөхийн барилдаанд манай тамирчин Молдавын бөх, 2024 оны “Antalya Grand Slam”-н аварга Адил Османовтой бяд сорилоо. Өрсөлдөгч нь шөвгийн 16-д Узбекстаны жүдоч ДАШТ-ий хүрэл медальт Муроджон Юлдошевийг ялсан юм. Хоёр бөх хоёул 24 настай үе чацуутангууд. Барилдаан эхлэнгүүт Османов ухасхийн мэхээ хийсэн ч манай бөх хөдөлсөнгүй. Эхний торгуулийг Б.Эрдэнэбаярт өгөв. Их л зууралдсан, хашир барилдаан үргэлжилсээр. Ээлжлэн тохолцов. Ерөнхийдөө хайрцагласан, багласан барилдаан болсоор. Дахиад Монголын бөхөд торгууль ирлээ. Барилдаан нэмэлт цаг руу орлоо. Эсрэг бөх барьцаа алдан анхны торгуулиа авав. Босч ирэээд мордож, шидээд дутуудууллаа. Нэмэлт цагийн 69 дэх секунд дээр манай бөх бараг л аваад залав. Хариу мэх удалгүй ирж, энэ нь айлын бөхөд хожлын оноо, манайд 3 дах торгууль нь боллоо.
Б.Эрдэнэбаяр дагах барилдаанаа Японы бөх Сойчи Хошимототой хийв. Барилдаан тун тэнцүүхэн өрнөсөн ч цаг дуусахаас 57 секундийн өмнө манай бөхийг ачих мэх хийхдээ толгойгоороо зоогдсон гэж үзэн торгосноор хожигдон, олимпын наадмын VII байрт шалгарав. Шүүгч нар удаашруулсан бичлэгээс шанаа юу, толгой юу гэдгийг сайн нягталсан байлгүй дээ. Тамирчныхаа дараа дараагийн тэмцээнд нь амжилт хүсье.
Б.Эрдэнэбаярын яриа Бичлэг үзэх
Гэрэл зургийг Ч.Ганбат
