The MongolZ багийн зөвхөн шагналын орлого 986.347 ам.долларт хүрчээ
Германд болсон “Thunderpick World Championship 2024” тэмцээнд Монголын “The MongolZ” баг HEROIC багийг хожсоноор аваргын цомыг 500.000 ам.доллар буюу ойролцоогоор 1.7 тэрбум төгрөгийн шагналыг газар дээр нь гардан авцгаагаад удаагүй байна. Мөн дэлхийн чансааны V байрт бичигдээд эхэлсэн. Цахим спортын зах зээлд эргэлдэх мөнгөний хэмжээ тасралтгүй өсч, тэмцээний тоо урьд өмнөхөөс олширч, үүнийгээ дагаад шагналын сан нь ч тэлэв. “CS2” төрлийн “The MongolZ” баг зөвхөн Монголын баг байхаа больж, олон улсад ч үзэгч фэнүүдийн хүрээ нь өргөжсөөр байна. Тэдний тэмцээн бүрт үзүүлж буй амжилтууд гайхалтай байж, үүнийхээ хэрээр ч ашиг орлого нь нэмэгдэж, дэлхийн баян багуудын тоонд зүй ёсоор орж эхэлжээ.
Энэ оны байдлаар “The MongolZ” багийн зөвхөн шагналын орлого нь 986.347 ам.доллар болж, оны төгсгөлд 1 сая ам.доллар давах төлөвтэй байна. Үүнээс гадна стикер, зар сурталчилгаа, ивээн тэтгэгчдийн орлого ч нэмэгдэнэ. Одоогоор орлогоороо “CS2”-ийн багуудаас Украины “NaVi” 1.6 сая ам.доллар, Оросын “Spirit” баг 1.4 сая ам.доллар, Германы “G2” 1.2 сая ам.доллар хүртсэн амжилтаараа тэргүүлж, Монголын баг дэлхийд дөрөвдүгээрт явна. Харин Германы MOUZ, Францын Vitality, АНУ-ын FaZe, Туркийн Eternal Fire тэргүүтэй дэлхийн том багууд шил дарсаар.
Манай залуусын онцлох амжилтуудыг дурьдвал/ам.доллароор/ :
- eXTREMESLAND 2023 Аварга 25.000
- PGL Мajor Copenhagen 2024 15-16 дугаар байр 20.000
- ESL Pro League Season 19 9-12 дугаар байр 23.500
- MESA Nomadic Masters Spring 2019 Аварга 50.000
- YaLLa Compass 2024 Аварга 200.000
- Esports World Cup 2024 9-12 дугаар байр 25.000
- Skyesports Championship 2024 Дэд аварга 70.000
- IEM Rio 2024 7-8 дугаар байр 6.000
- ESL Pro League Season 20 9-12 дугаар байр 23.500
- IEM Cologne 2024 9-12 дугаар байр 16.000
- ESL Challenger at DreamHack Summer 2024 5-6 дугаар байр 3.000
- IEM Katowice 2024 17-20 дугаар байр 4.500
- Elisa Masters Espoo 2024 3-4 дүгээр байр 15.000
- Thunderspick World Championship 2024 Аварга 500.000
