Даян аваргын сийрэгхэн барилдаан

“Наурызын баяр”-т зориулсан улс, аймаг, цэргийн алдар цолтой хүчит 128 бөхийн уламжлалт барилдаанд Увс аймгийн Ховд сумын харъяат, “Сүлд” спорт хороо, “Хемон констракшн”, “Увс нуур” дэвжээний бөх, даян аварга Намсрайжавын Батсуурь түрүүлж, Ховд аймгийн Зэрэг сумын харъяат, “Аврагч” спорт хороо, “Монтед” констракшн, “Өнө мөнх хөгжил констракшн” ХХК, “Валькан” групп, “Ховд” дэвжээний бөх, улсын заан Баярхүүгийн Бат-Өлзий үзүүрлэв. Аварга барилдааны эхнээс давуулж барьсан барьцаа лавшруулсаар сийрэгхэн барилдаан харуулан, зайлж бусган давлаа. Их шөвөгт Баянхонгор аймгийн Баянбулаг сумын харъяат, “Хүч” спорт хороо, “Мөнхийн үсэг” групп, “Нэгдэл” клуб, “Их богд” дэвжээний бөх, улсын үнэн зоригт харцага Н.Золбоо, Сүхбаатар аймгийн Онгон сумын харъяат, Хилчин спорт хороо, “Эвт Чулуу” ХХК, “Бадамлах Нар” ХХК, “Нэгдэл” клуб, Жавхлант дэвжээний бөх, аймгийн хурц арслан Н.Өсөхбаяр нар шалгарсан. 6-гийн даваанд даян аварга харцагыг амлаж, заан аймгийн арслан хоёр тунаж барилдсан юм. Дунд шөвөгт улсын арслан Р.Пүрэвдагва, улсын заан Ц.Одбаяр, Д.Анар, Б.Серик нар үлдсэн байна. Энэ барилдааны түрүү бөхөд Соната-9 маркын автомашин, үзүүр бөхөд 4 сая, дөрөвт шалгарсан бөхчүүд тус бүрт 2 сая, наймд шалгарсан бөхчүүд мөн тус бүр 1 сая төгрөгийн бай гардсан бөгөөд бусад давааны бай шагналыг нэмэгдүүлэн өгсөн аж.

“Өлгийн хүчтэн” дэвжээний тэргүүн Ж.Нурбек “Улсын цолд ойрхон бөх”-ийн шагналыг аймгийн хурц арслан М.Еркебуланд, “Аймгийн цол ойрхон бөх”-ийн шагналыг сумын заан Х.Гасырбект, “Өсөх ирээдүйтэй бөх”-ийн шагналыг аймгийн заан Е.Көптилект тус тус гардуулав. Бай шагнал өндөртэй тус барилдааныг “Өлгий нутгийн хөгжлийн зөвлөл”, “Өлгийн хүчтэн” дэвжээнээс МҮБХ-той хамтран зохион байгуулжээ.